Os sentidos: a vista

POLO SAN MARTIÑO, BUXAINAS NO CAMIÑO

O día 11 de novembro foi o día da buxaina e na escola da Carreira aproveitamos para falar deste día e recuperar un pouco a tradición deste xogo tradicional galego.

Ademáis como coincidimos coa semana da ciencia en galego, fixemos peons repartindo os discos nas cores da arco iris para logo experimentar como ían fundíndose nun cor pastel case branco. Fixemos máis experimentos con discos que mesturaban outras cores en diferentes proporcións e mesmo discos con metade branca e outra negra. En todos aparecían efectos visuais cando o peón xiraba moi rápido, o que tamén serviunos como experimento complementario do tema que estamos a tratar en Coñecemento do Medio (os sentidos)

 Os alumnos disfrutaron un montón xogando cos peóns e probaron peóns feitos de diferentes materiais: o clásico de madeira, os peóns feitos a modo de discos de papel, o peón feito coa técnica de papiroflexia...

A casa do terror

No terceiro tema de Educación Artística estamos a dar o Samaín e aproveitamos para axudar a decorar a aula cunha casa do terror. Seguimos os pasos indicados no programa de Art Atack sobre cómo debuxar unha mansión terrorífica a partir dun lápiz de grafito, ceras negras para dar efectos de sombra; e ceras brancas para dar efectos de luz. Logo cun pouco de imaxinación, rematamos de decorar o lugar de forma moi sinistra.

O comedor asiático

No segundo tema de Educación Artística estamos a dar os alimentos, ao igual que en Coñecemento do Medio. Por iso eleximos como tema de debuxo un comedor, pero asiático (traballando á vez o tema anual) Ademáis aprendimos a debuxar sombras co lápiz de grafito e a facer un estudo da luz en diferentes ángulos.

Personaxes de Asia

No primeiro tema de Eduación Artística tratamos o corpo, as articulacións e a posición para reforzar á vez os contidos que están a dar os nenos en Coñecemento do Medio. Como este ano estamos a tratar o tema anual de Asia, aproveitamos para aprender a debuxar algúns personaxes deste continente:

As fiadas

Outra festa tradicional galega deste tempo son as fiadas. No mes de setembro as mulleres reuníanse para fiar a lá de ovella e comezar a facer os traxes e menaxe que precisaban para despois usalas durante o inverno.

Na clase de galego estamos a facer un traballo cos teares. Eleximos lás moi gordiñas e de cores vivos para ir formando un anaco de tea que poderemos usar para facer unha mantiña, unha almofada ou unha saia para unha boneca.

As Festas do Outono: A Esfolla

Para a celebración da Esfolla na escola tivemos a sorte de contar con dúas mamás que nos viñeron a contar como celebraban esta festa na súa casa.

Raquel e Teresa trouxéronnos unha presa de mazarocas para debagar (ou debrullar) na clase e despois peneirar o maínzo.

Mentres o faciamos contáronnos que non todo o millo é igual nin se utilizaba para o mesmo, desta forma un tipo de millo prantábase para alimentar aos animais (galiñas, porcos, vacas...) e outro para facer o pan.

O pan de millo probámolo grazas ao noso panadeiro Xosé que nos regalou unha bola riquísima!

Mirade que pintaza! É un pan máis denso e máis amarelo que o de trigo. A códea triscaba ao mordela. MMMmmmmmm...

Raquel contábanos que as follas das mazarocas, unha vez que estaban secas e só as follas que quedaban pegadas ao millo,  utilizábanse como recheo para o colchón e as almofadas.

Nesta foto, Álex atopou unha "reina" que é o grao de millo que é de cor vermella.





Trouxéronnos unha peneira para vela de cerca e peneiramos un cacho para ver como caían os liscos e quedaban os graos limpiños enriba da rede.

Aínda temos pendente comer unhas pombiñas de millo, que é outro grao diferente ao que vimos na escola, pero tamén é millo.

Para rematar a festa aprendimos unha canción da esfolla do grupo migallas:

Este foi o noso día de Esfolla. Resumímovolo nun vídeo pequeniño coas fotos.

GRAZAS RAQUEL E TERESA!!

A Esfolla - diapositivas

Os Cinco Sentidos

Preparando o nariz, ollos, boca e mans... que imos comezar!!

Esta semana empezamos a traballar os cinco sentidos "Oído, olfacto, vista gusto e tacto".
Para iso fixemos un experimento: cos ollos vendados ulimos, palpamos e probamos alimentos que nos daba a profe María.

Os alimentos do experimento foron: mandarina, limón, chocolate con leite, chocolate con laranxa, pepinillos en vinagre, aceitunas e chourizo. Tivemos que recoñecelos sen miralos e fixarnos ben no seu olor, textura e sabor.

Despois traballamos con catro especias: pementa negra, pementa branca, pimentón doce e curry. Para iso destapamos os ollos e puidemos ver as distintas cores.

Por último, elaboramos un rexistro e fixemos unha clasificación dos alimentos polo seu olor, sabor, cor e textura.

Cada un de nós ten preferencias por alimentos diferentes en función dos sabores e as texturas. Martín debecía polo acedo do limón, mentres que a Silvia encantáballe o contraste de amargo e doce do chocolate con laranxa. A Kiara encantoulle a cor do pimentón doce e a Sara gústalle moito a pulpa suave e húmida da mandaria. Entre todos fumos expoñendo as cousas que máis nos chamaron a atención e anotamos na folla de rexistro os datos.

Tan só queda arquivar as conclusión do noso experimento da semana.